🙏 Bhaj Govindam Hindi PDF Download | भज गोविंदं भज 🌺

Bhaj Govindam Hindi PDF Download | भज गोविंदं भज

🙏ૐ🙏
|| भज गोविंदं भज ||

Bhaj Govindam Hindi PDF Lyrics

─── ⋆⋅☆⋅⋆ ───
भज गोविंदं भज गोविंदं
गोविंदं भज मूढमते |
संप्राप्ते सन्निहिते काले
नहि नहि रक्षति डुकृंकरणे || १ ||

मूढ जहीहि धनागमतृष्णां
कुरु सद्बुद्धिं मनसि वितृष्णाम् |
यल्लभसे निजकर्मोपात्तं
वित्तं तेन विनोदय चित्तम् || २ ||

नारीस्तनभर-नाभीदेशं
दृष्ट्वा मा गा मोहावेशम् |
एतन्मांसवसादिविकारं
मनसि विचिंतय वारं वारम् || ३ ||

नलिनीदल-गतजलमतितरलं
तद्वज्जीवितमतिशय-चपलम् |
विद्धि व्याध्यभिमानग्रस्तं
लोकं शोकहतं च समस्तम् || ४ ||

यावद्वित्तोपार्जनसक्तः
तावन्निजपरिवारो रक्तः |
पश्चाज्जीवति जर्जरदेहे
वार्तां कोऽपि न पृच्छति गेहे || ५ ||

यावत्पवनो निवसति देहे
तावत्पृच्छति कुशलं गेहे |
गतवति वायौ देहापाये
भार्या बिभ्यति तस्मिन्काये || ६ ||

बालस्तावत्क्रीडासक्तः
तरुणस्तावत्तरुणीसक्तः |
वृद्धस्तावच्चिंतासक्तः
परमे ब्रह्मणि कोऽपि न सक्तः || ७ ||

का ते कांता कस्ते पुत्रः
संसारोऽयमतीव विचित्रः |
कस्य त्वं कः कुत आयातः
तत्त्वं चिंतय तदिह भ्रातः || ८ ||

सत्संगत्वे निस्संगत्वं
निस्संगत्वे निर्मोहत्वम् |
निर्मोहत्वे निश्चलतत्त्वं
निश्चलतत्त्वे जीवन्मुक्तिः || ९ ||

वयसि गते कः कामविकारः
शुष्के नीरे कः कासारः |
क्षीणे वित्ते कः परिवारः
ज्ञाते तत्त्वे कः संसारः || १० ||

मा कुरु धन-जन-यौवन-गर्वं
हरति निमेषात्कालः सर्वम् |
मायामयमिदमखिलं हित्वा
ब्रह्मपदं त्वं प्रविश विदित्वा || ११ ||

दिनयामिन्यौ सायं प्रातः
शिशिरवसंतौ पुनरायातः |
कालः क्रीडति गच्छत्यायुः
तदपि न मुंचत्याशावायुः || १२ ||

का ते कांता धनगतचिंता
वातुल किं तव नास्ति नियंता |
त्रिजगति सज्जनसंगतिरेका
भवति भवार्णवतरणे नौका || १३ ||

द्वादश-मंजरिकाभिरशेषः
कथितो वैयाकरणस्यैषः |
उपदेशोऽभूद्विद्या-निपुणैः
श्रीमच्छंकर-भगवच्छरणैः || १४ ||

जटिलो मुंडी लुंछितकेशः
काषायांबर-बहुकृतवेषः |
पश्यन्नपि च न पश्यति मूढः
उदरनिमित्तं बहुकृतवेषः || १५ ||

अंगं गलितं पलितं मुंडं
दशनविहीनं जातं तुंडम् |
वृद्धो याति गृहीत्वा दंडं
तदपि न मुंचत्याशापिंडम् || १६ ||

अग्रे वह्निः पृष्ठे भानुः
रात्रौ चुबुक-समर्पित-जानुः |
करतल-भिक्षस्तरुतलवासः
तदपि न मुंचत्याशापाशः || १७ ||

कुरुते गंगासागरगमनं
व्रत-परिपालनमथवा दानम् |
ज्ञानविहीनः सर्वमतेन
भजति न मुक्तिं जन्मशतेन || १८ ||

सुरमंदिर-तरु-मूल-निवासः
शय्या भूतलमजिनं वासः |
सर्व-परिग्रह-भोगत्यागः
कस्य सुखं न करोति विरागः || १९ ||

योगरतो वा भोगरतो वा
संगरतो वा संगविहीनः |
यस्य ब्रह्मणि रमते चित्तं
नंदति नंदति नंदत्येव || २० ||

भगवद्गीता किंचिदधीता
गंगाजल-लवकणिका पीता |
सकृदपि येन मुरारिसमर्चा
क्रियते तस्य यमेन न चर्चा || २१ ||

पुनरपि जननं पुनरपि मरणं
पुनरपि जननीजठरे शयनम् |
इह संसारे बहुदुस्तारे
कृपयाऽपारे पाहि मुरारे || २२ ||

रथ्याचर्पट-विरचित-कंथः
पुण्यापुण्य-विवर्जित-पंथः |
योगी योगनियोजित-चित्तः
रमते बालोन्मत्तवदेव || २३ ||

कस्त्वं कोऽहं कुत आयातः
का मे जननी को मे तातः |
इति परिभावय सर्वमसारं
विश्वं त्यक्त्वा स्वप्नविचारम् || २४ ||

त्वयि मयि चान्यत्रैको विष्णुः
व्यर्थं कुप्यसि मय्यसहिष्णुः |
भव समचित्तः सर्वत्र त्वं
वांछस्यचिराद्यदि विष्णुत्वम् || २५ ||

शत्रौ मित्रे पुत्रे बंधौ
मा कुरु यत्नं विग्रहसंधौ |
सर्वस्मिन्नपि पश्यात्मानं
सर्वत्रोत्सृज भेदाज्ञानम् || २६ ||

कामं क्रोधं लोभं मोहं
त्यक्त्वाऽऽत्मानं पश्यति सोऽहम् |
आत्मज्ञानविहीना मूढाः
ते पच्यंते नरकनिगूढाः || २७ ||

गेयं गीता-नामसहस्रं
ध्येयं श्रीपति-रूपमजस्रम् |
नेयं सज्जन-संगे चित्तं
देयं दीनजनाय च वित्तम् || २८ ||

सुखतः क्रियते कामाभोगः
पश्चादंत शरीरे रोगः |
यद्यपि लोके मरणं शरणं
तदपि न मुंचति पापाचरणम् || २९ ||

अर्थमनर्थं भावय नित्यं
नास्तिततः सुखलेशः सत्यम् |
पुत्रादपि धनभाजां भीतिः
सर्वत्रैषा विहिता रीतिः || ३० ||

प्राणायामं प्रत्याहारं
नित्यानित्य विवेकविचारम् |
जाप्यसमेतसमाधिविधानं
कुर्ववधानं महदवधानम् || ३१ ||

गुरुचरणांबुज-निर्भरभक्तः
संसारादचिराद्भव मुक्तः |
सेंद्रियमानस-नियमादेवं
द्रक्ष्यसि निजहृदयस्थं देवम् || ३२ ||

मूढः कश्चन वैयाकरणो
डुःकृंकरणाध्ययनधुरीणः |
श्रीमच्छंकर-भगवच्छिष्यैः
बोधित आसीच्छोधित-करणः || ३३ |

भज गोविंदं भज गोविंदं
गोविंदं भज मूढमते |
नामस्मरणादन्यमुपायं
नहि पश्यामो भवतरणे || ३४ ||
─── ⋆⋅☆⋅⋆ ───